ກະຊວງ ປທສ ມອບໃບຍ້ອງຍໍໃຫ້ກັບອົງການ JICA
Posted by kokkee on February 22 2019 21:28:55

ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ (ປທສ) ໄດ້ຈັດພິ​ທີມອບໃບຍ້ອງຍໍໃຫ້ອົງການຮ່ວມມືສາກົນປະເທດຢີ່ປຸ່ນ (JICA) ໃນວັນທີ 21 ກຸມພານີ້. ທີ່ຫ້ອງຮັບແຂກ ກະຊວງ ປທສ ເປັນກຽດມອບໂດຍທ່ານ ທອງໃສ ຊານໄຊຍະ ຮອງລັດຖະມົນຕີ ກະຊວງ ປທສ

          ໃນໂອກາດນີ້, ທ່ານຄໍາຫຼ້າ ສູນນະລັດ ຫົວໜ້າສູນສະກັດກັ້ນ ແລະ ແກ້ໄຂເຫດສຸກເສີນທາງຄອມພິວເຕີ ໄດ້ກ່າວວ່າ: ສູນລາວເຊີດ ໄດ້ສ້າງຕັ້ງຂຶ້ນໃນປີ 2012 ແລະ ໄດ້ມີການແຈ້ງເປັນທາງການໃຫ້ບັນດາປະເທດສະມາຊິກອາຊຽນ ແລະ ອົງການຈັດຕັ້ງສາກົນທີ່ກ່ຽວຂ້ອງຮັບຮູ້ ແລະ ສາມາດເຮັດວຽກຮ່ວມກັບສູນລາວເຊີດ ໃນວຽກງານດ້ານຄວາມປອດໄພທາງລະບົບຄອມພິວເຕີ. ໃນເບຶ່ອງຕົ້ນ ສູນລາວເຊີດ ໄດ້ພົບຄວາມຫຍຸ້ງຍາກໃນດ້ານການສ້າງບຸກຄະລະກອນ ເຊິ່ງອົງການ JICA ປະເທດ ຢີ່ປຸ່ນ ເປັນອົງກອນທໍາອິດທີ່ເຂົ້າມາແນະນໍາ ແລະ ໃຫ້ການຮ່ວມມືຊ່ວຍເຫຼືອໃນການສ້າງບຸກຄະລະກອນ ດ້ວຍຮູບແບບໃນທຶນຝຶກອົບຮົມ ເລີ່ມແຕ່ປີ 2012 ມາເຖິງປະຈຸບັນ ລວມທັງໝົດ 49 ທຶນ, ຖ້າທຽບໃສ່ງົບປະມານທີ່ລັດຖະບານ ກໍ່ຄືກະຊວງ ປທສ ຕ້ອງໄດ້ລົງທຶນເປັນຈໍານວນຫຼາຍ. ແຕ່ດ້ວຍຄວາມເອົາໃຈໃສ່ຂອງ ທ່ານ IDE HIROYUKI  ຢ່າງໃກ້ຊິດ ແລະ ຄົ້ນຄວ້າຍາດແຍ່ງທຶນຮອນອັນໃຫຍ່ຫຼວງນີ້ມາໃຫ້ພວກເຮົາ. ຈຶ່ງເຮັດໃຫ້ວິຊາການຂອງ ກະຊວງ ປທສ ເວົ້າລວມ, ເວົ້າສະເພາະ ແມ່ນວິຊາການຂອງ ສູນລາວເຊີດ ໄດ້ຮຽນຮູ້ເຕັກນິກໃນການຕ້ານ ແລະ ແກ້ໄຂເຫດສຸກເສີນທາງຄອມພິວເຕີ ສາມາດເຮັດວຽກປະສານງານຮ່ວມກັບສູນເຊີດໃນອາຊຽນ, ພາກພື້ນ ແລະ ສາກົນໄດ້ດີຂຶ້ນມາເປັນກ້າວໆ.
          ໃນຕອນທ້າຍ ທ່ານ ທອງໃສ ຊານໄຊຍະ ຍັງໄດ້ກ່າວຄໍາ ຂອບໃຈ ແລະ ຕີລາຄາສູງໃນການໃຫ້ຄວາມຊ່ວຍເຫຼືອດັ່ງກ່າວມາຍັງ ອົງການ JICA ປະເທດ ຍີ່ປຸ່ນ ແລະ ທ່ານ IDE HIROYUKI ພວກເຮົາຫວັງຢ່າງຍິ່ງວ່າຈະໄດ້ຮັບການຊ່ວຍເຫຼືອ ໃນການພັດທະນາວຽກງານ ຄວາມປອດໄພທາງລະບົບຄອມພິວເຕີ ໃນປັດຈຸບັນ ແລະ ຕໍ່ໜ້າ.

 

ຂ່າວ+ພາບ: ຫ້ອງການກະຊວງ